Thursday 20th of January 2022 08:10:09 AM GMT

LANGUAGE - TAMIL
-
ஒமிக்ரோன் ஆபத்தை குறைத்து மதிப்பிடக்கூடாது; உலக சுகாதார அமைப்பு!

ஒமிக்ரோன் ஆபத்தை குறைத்து மதிப்பிடக்கூடாது; உலக சுகாதார அமைப்பு!


ஒமிக்ரோன் உருத்திரிபு வைரஸ் டெல்டாவை விட லேசான பாதிப்புகளையே ஏற்படுத்துவதாக தோற்றபாடு காணப்படுகிறது. எனினும் இந்தத் திரிபை குறைத்து மதிப்பிடக் கூடாது என உலக சுகாதார அமைப்பு எச்சரித்துள்ளது.

தென்னாப்பிரிக்காவில் முதன்முதலில் அடையாளம் காணப்பட்ட ஒமிக்ரோன் திரிபால் பாதிக்கப்பட்டவர்கள் மத்தியில் மருத்துவமனையில் அனுமதிக்கப்பட வேண்டிய ஆபத்து ஒப்பீட்டளவில் குறைவாகவே காணப்படுவதாக ஆரம்பகட்ட தரவுகள் தெரிவிக்கின்றன என நேற்று வியாழக்கிழமை ஜெனீவாவில் செய்தியாளர்களிடம் பேசிய உலக சுகாதார அமைப்பின் நோயாளர் பராமரிப்பு முகாமைத்துவ பிரிவு தலைவர் ஜேனட் டயஸ் குறிப்பிட்டார்.

ஒமிக்ரோனால் பாதிக்கப்படும் இளையவர்கள் மற்றும் வயதானவர்கள் இருதரப்பினரிடையிலும் நோயின் தீவிரத்தன்மை குறைவாக இருப்பதாகவே தோன்றுகிறது எனவும் அவா் சுட்டிக்காட்டினார்.

எனினும் இதுவரை வெளியான ஆய்வுகளின் முடிவுகள் இளையவர்களை அடிப்படையாகக் கொண்டே முன்னெடுக்கப்பட்டுள்ளன. முதியவர்களிடையே ஒமிக்ரோன் எவ்வகையான தாக்கங்களை ஏற்படுத்தும் என்பது குறித்து இன்னும் உறுதியாகக் கூற முடியாதுள்ளது எனவும் ஜேனட் டயஸ் தெரிவித்தார்.

டெல்டாவுடன் ஒப்பிடும்போது ஒமிக்ரோன் தீவிரம் குறைந்ததாகத் தோன்றினாலும் இது குறித்துக் கவனயீனமாக இருக்கக்கூடாது என இதே செய்தியாளர் சந்திப்பில் கருத்து வெளியிட்ட உலக சுகாதார அமைப்பின் தலைவர் டெட்ரோஸ் அதானோம் கெப்ரேயஸ் கூறினார்.

ஏனைய திரிபுகளை விட ஒமிக்ரோன் அதிவேக பரவல் காரணமாக தொற்று நோயாளர் தொகை அதிகரித்துச் செல்கிறது. அத்துடன், மரணங்களும் பதிவாகி வருகின்றன.

டெல்டா மற்றும் ஒமிக்ரோன் திரிபுகளின் கலவையானது மிகத் தீவிரமாக பரவி ஆபத்தான சுனாமி போன்ற கொரோனா அலையை உலகெங்கும் ஏற்படுத்தி வருகிறது எனவும் அவா் எச்சரித்தார்.

உலகெங்கும் 5.8 மில்லியனுக்கும் அதிகமான மக்களைக் கொன்ற வைரஸைக் கட்டுப்படுத்த அரசாங்கங்கள் தொடர்ந்து போராடுகின்றன எனவும் அவா் சுட்டிக்காட்டினார்.

இவ்வாறான நிலையில் உலகம் முழுவதும் சமமான அளவில் தடுப்பூசிகள் பகிரப்பட வேண்டும். உலகில் அனைவருக்கும் தடையின்றித் தடுப்பூசிகள் கிடைப்பதை உறுதி செய்ய வேண்டும் என டெட்ரோஸ் அதானோம் கெப்ரேயஸ் மீண்டும் வலியுறுத்தினார்.

தொற்று நோயை முடிவுக்குக் கொண்டு வர இவ்வாண்டு ஜூலை மாதத்திற்குள் அனைத்து நாடுகளிலும் உள்ள குறைந்தது 70% மக்களுக்கு தடுப்பூசி போடப்பட வேண்டும் என உலக சுகாதார அமைப்பு இலக்கு நிர்ணயித்துள்ளது. தொற்று நோயை முடிவுக்குக் கொண்டு வருவதில் இந்த இலக்கை அடைவது முக்கிய படியாக இருக்கும் எனவும் அவர் தெரிவித்தார்.

இதற்கிடையே, உலகில் 36 நாடுகள் தங்கள் மக்கள் தொகையில் 10 வீதமானவர்களுக்கு கூட இதுவரை தடுப்பூசி போடவில்லை என உலக சுகாதார அமைப்பின் ஆலோசகர் புரூஸ் அய்ல்வர்ட் இந்த செய்தியாளர் சந்திப்பில் சுட்டிக்காட்டினார். உலகெங்கிலும் கொவிட் தொற்றுக்குள்ளாகி கடுமையாகப் பாதிக்கப்பட்டுள்ளவர்கள் 80 வீதமானவர்கள் தடுப்பூசி போடப்படாதவர்கள் எனவும் அவா் குறிப்பிட்டார்.


Category: உலகம், புதிது
Tags: கொரோனா (COVID-19), உலகம்



பிந்திய செய்திகள்

BABY NAMES

Lorem Ipsum is simply dummy text of the printing and typesetting industry.

READ MORE