Thursday 20th of January 2022 07:21:23 AM GMT

LANGUAGE - TAMIL
.
கஜகஸ்தானில் போராட்டக்காரர்களை கண்டவுடன் சுட ஜனாதிபதி உத்தரவு!

கஜகஸ்தானில் போராட்டக்காரர்களை கண்டவுடன் சுட ஜனாதிபதி உத்தரவு!


கஜகஸ்தானில் எரிபொருள் விலை அதிகரிப்புக்கு எதிராக ஆரம்பித்த பெரும் மக்கள் மக்கள் போராட்டம் அரசுக்கு எதிரான போராட்டமாக தொடர்ந்து வலுவடைந்து வரும் நிலையில் போராட்டக்காரர்களை முன்னெச்சரிக்கையின்றி கண்டவுடன் சுட கஜகஸ்தான் ஜனாதிபதி காசிம் ஜோமார்ட் டோக்காயேவ் உத்தரவிட்டுள்ளார்.

இதனையடுத்து போராட்டக்காரர்கள் மீது பாதுகாப்பு படையினர் கண்மூடித்தனமான துப்பாக்கிச்சூடு நடத்தி வருகின்றனர்.

கஜகஸ்தானில் இடம்பெறும் வன்முறைகளால் இதுவரை பாதுகாப்பு படையினர் 18 பேரும், போராட்டக்காரர்களில் 26 பேரும் உயிரிழந்ததாக கஜகஸ்தான் உள்துறை அமைச்சு தெரிவித்துள்ளது.

போராட்டம் தொடர்ந்து நடைபெற்று வருவதால் பலி எண்ணிக்கை அதிகரிக்கலாம் என்ற அச்சம் எழுந்துள்ளது.

இதேவேளை, கலவரத்தில் ஆயிரத்துக்கும் மேற்பட்டோர் படுகாயம் அடைந்தனர். அவர்களில் பலர் மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர்.

இந்நிலையில் எரிபொருள் விலையேற்றத்தை எதிர்த்து நடைபெற்ற போராட்டங்களின் போது தலைநகர் அல்மாட்டியின் முக்கிய நகரத்தை 20,000 கொள்ளையர்கள் தாக்கி சூறையிட்டதாக ஜனாதிபதி காசிம் ஜோமார்ட் டோக்காயேவ் கூறினார்.

அவர்களில் பலர் வெளிநாட்டில் பயிற்சி பெற்ற பயங்கரவாதிகள் என எந்த ஆதாரங்களும் இன்றி அவா் குற்றஞ்சாட்டினார்.

அரச தொலைக்காட்சியில் பேசிய ஜனாதிபதி டோக்காயேவ் போராட்டக்காரர்களுடன் பேச்சுவார்த்தை நடத்துவது முட்டாள்தனம் என்று அவர் நிராகரித்தார். குற்றவாளிகள் மற்றும் கொலைகாரர்களுடன் நாம் எப்படி பேச்சு நடத்த முடியும்? என அவா் கேள்வி எழுப்பினார்.

நாங்கள் ஆயுதம் ஏந்திய மற்றும் நன்கு தயார்படுத்தப்பட்ட உள்ளூர் மற்றும் வெளிநாட்டுக் கொள்ளையர்களை சமாளிக்க வேண்டியுள்ளது. இன்னும் தெளிவாகக் கூறினால் நாம் பயங்கரவாதிகளுடன் போரிட வேண்டியுள்ளது. அவா்களுடன் பேச்சுவார்த்தை சாத்தியம் இல்லை. நாம் அவர்களை அழிக்க வேண்டும். இது விரைவில் நடக்கும் எனவும் டோக்காயேவ் தெரிவித்தார்.

எனினும் அரச எதிர்ப்பு போராட்டக்காரர்களை பயங்கரவாதிகள் என ஜனாதிபதி விமர்சித்துள்ளதை கஜகஸ்தான் எதிர்க்கட்சிகள் நிராகரித்துள்ளன. மக்கள் போராட்டத்தை ஜனாதிபதி பயங்கரவாதமாக சித்தரிப்பதாகவும் எதிர்க்கட்சியினர் தெரிவித்துள்ளனர்.

இதற்கிடையில் கஜகஸ்தானில் போராட்டங்களைக் கட்டுப்படுத்த உதவுமாறு ஜனாதிபதி காசிம் ஜோமார்ட் டோக்காயேவ் விடுத்த அழைப்பை ஏற்று ரஷியாவில் இருந்து அமைதிப் படை களமிறக்கப்பட்டுள்ளது.

கஜகஸ்தானில் எரிபொருள் விலை அதிகரிப்புக்கு எதிராக நாடு முழுவதும் மக்கள் திரண்டதால் வேறு வழியின்றி பிரதமர் அஸ்கர் மாமின் தலைமையிலான அரசு ராஜினாமா செய்துள்ளது.

இந்த ராஜினாமாவை கஜகஸ்தான் ஜனாதிபதி காசிம் ஜோமார்ட் டோக்காயேவ் ஏற்றுக் கொண்டார்.

இதையடுத்து அந்த நாட்டில் அவசர நிலை பிரகடனப்படுத்தப்பட்டது. மக்கள் நடமாட தடை விதிக்கப்பட்டுள்ளது. மேலும் எரிவாயு விலையை கட்டுப்படுத்துமாறு மாகாண ஆளுநர்களுக்கு ஜனாதிபதி உத்தரவிட்டுள்ளமையும் குறிப்பிடத்தக்கது.


Category: உலகம், புதிது
Tags:



பிந்திய செய்திகள்

BABY NAMES

Lorem Ipsum is simply dummy text of the printing and typesetting industry.

READ MORE