விக்னேஷ் சிவன் - நயன்தாரா தயாரிப்பில் உருவாகியுள்ள 'கூழாங்கல்' திரைப்படம் ஒஸ்கார் போட்டியில் இருந்து வெளியேறி இருக்கிறது.
நயன்தாரா, விக்னேஷ் சிவனுடன் இணைந்து தயாரித்துள்ள 'கூழாங்கல்' திரைப்படம் இந்தியா சார்பில் ஒஸ்கார் போட்டிக்கு அனுப்பி வைக்கப்பட்டிருந்தது.
சமீபத்தில் ஒஸ்கார் பட்டியலில் இடம்பெற்றுள்ள படங்கள் பட்டியல் ஒஸ்கார் இணையதளத்தில் அதிகாரப்பூர்வமாக வெளியிடப்பட்டது. இந்த பட்டியலில் கூழாங்கல் திரைப்படம் இடம்பெற்று இருந்தது.
ஒஸ்கார் விருது வழங்கும் விழா அடுத்த வருடம் மார்ச் மாதம் 27-ந் தேதி அமெரிக்காவில் உள்ள லாஸ் ஏஞ்சல்ஸ் நகரில் நடைபெற உள்ளது.
ஒஸ்கார் விருதுக்கு 15 படங்கள் இறுதி செய்யப்பட்டு அதில் ஒரு படத்துக்கு சிறந்த வெளிநாட்டு திரைப்படத்துக்கான ஒஸ்கார் விருது வழங்கப்படும்.
இந்த நிலையில், ஒஸ்கார் வெளியிட்டுள்ள இறுதி பட்டியலில் கூழாங்கல் திரைப்படம் இடம்பெறவில்லை. இதன் மூலம் ஒஸ்கார் போட்டியிலிருந்து கூழாங்கல் திரைப்படம் வெளியேறி உள்ளது.
இதுகுறித்து விக்னேஷ் சிவன் தனது சமூக வலைத்தள பக்கத்தில், 'இந்த பட்டியலில் இருந்திருந்தால் நன்றாக இருந்திருக்கும்! இருப்பினும் இவ்வளவு தூய்மையான சினிமாவை கொடுத்ததற்காக பி.எஸ்.வினோத்ராஜ்-க்கு நான் நன்றி கூறுகிறேன்.
இந்த ஆண்டு ஆஸ்கார் விருதுக்கான அதிகாரப்பூர்வ நுழைவாக எங்கள் படத்தைத் தேர்ந்தெடுத்த இந்திய ஜூரி உறுப்பினர்களுக்கு எனது நன்றிகள். எங்கள் நலம் விரும்புபவர்கள் மற்றும் நண்பர்கள் அனைவருக்கும் நன்றி' என்று தெரிவித்துள்ளார்.
Category: சினிமா, புதிது
Tags: இந்தியா, அமெரிக்கா, தமிழ்நாடு, சென்னை
%20copy.jpg)
