சகல இலங்கை சமூகத்துக்கும் நிலையான, சகலதும் அடங்கலான வளர்ச்சியை அமெரிக்கா உறுதிசெய்யும் என அமெரிக்க வெளியுறவுச் செயலாளர் மைக் பம்பியோ ஜனாதிபதி கோட்டாபய ராஜபக்சவுடனான சந்திப்பின்போது உறுதியளித்துள்ளார்.
சுகாதார, மனிதாபிமான, பொருளாதார விவகாரங்களில் அமெரிக்கா தொடர்ந்து இலங்கைக்கு ஒத்துழைப்பு வழங்கும் எனவும் மைக் பம்பியோ உறுதியளித்ததாகவும் இலங்கைக்கான அமெரிக்கத் தூதரகம் வெளியிட்டுள்ள ருவிட்டர் செய்தியில் கூறப்பட்டுள்ளது.
அத்துடன் வெளிப்படையான வர்த்தக, முதலீட்டின் அடிப்படையிலான பொருளாதார பங்காண்மை, கொரோனா தொற்றுப் பரவலின் பின்னரான பொருளாதார மீட்சியின் முக்கிய அங்கங்கள் - அதேபோல், ஜனநாயக சுதந்திரங்களுக்கான அமெரிக்காவின் பகிரப்பட்ட உறுதிப்பாடு உள்ளிட்ட விவகாரங்கள் குறித்து பம்பியோ இலங்கை ஜனாதிபதியுடன் கலந்துரையாடியதாக அமெரிக்க துதரகம் தெரிவித்துள்ளது.
இலங்கை வந்துள்ள அமெரிக்க வெளியுறவுச் செயலாளர் மைக் பம்பியோ இன்று காலை ஜனாதிபதி கோட்டாபய ராஜபக்சவைச் சந்தித்தபோதே இந்த உறுதிமொழிகள் வழங்கப்பட்டதாக அதில் தெரிவிக்கப்பட்டுள்ளது.
இதேவேளை, ஜனாதிபதியுடனான சந்திப்பைத் தொடர்ந்து வெளிவிவகார அமைச்சர் தினேஸ் குணவர்த்தனவை பம்பியோ சந்தித்தார்.
இறைமையுடைய, பாதுகாப்பான இலங்கைக்கான அமெரிக்காவின் உறுதிப்பாட்டை மீள் உறுதிசெய்யும் வகையில் இச்சந்திப்பு அமைந்திருந்ததாக இலங்கைக்கான அமெரிக்க தூதரகம் வெளியிட்டுள்ள ருவிட்டர் செய்தியில் தெரிவிக்கப்பட்டுள்ளது.
%20copy.jpg)
%20copy.jpg)
